KAREBA SULTENG, PALU- Saito supir truk FA (35) niboba batako ri tempona noantri solar ri SPBU Ponegoro Palu, eo Jumaa bongina (9/10/2026).
Anu hai nompamula ri tempona FA nosuaraka Barcode ala manggava solar. Bara berimba torsangka pelaku supir truk EK, nakava neboba batako ri tundu FA.
Kapolsek Palu Barat, Iptu Irfan nangulika korban (FA) nonturo ri Kecamatan Kinovaro, Kabupaten Sigi. Korban FA nabaka ri tundu bo nikenimo ri Ruma Saki Anutapura Palu.
Panguli i Irfan, saito saksi NA (51) topo aturu antrean BBM solar nanggita kajadia hai. Kajadia hai muni nikita saksi S (45) nokarja ri Dinas Perhubungan Kota Palu.
Sakidepa nagado ri SPBU Ponegoro. Sampesuvu korban FA nakava ri libo kajadia nanggeni taono. Nauntu polisi nakava nompaka aman, ante notalipo tope boba ala makava. Naupu hai tope boba nikeni ri kantoro Polsek Palu Barat.
Niposabaka kajadia hai, urusa poisi BBM ri SPBU Ponegoro nenonto sampariolo.
Polisi muni nerapi ka sampesuvu korban ala domo magado. Sampesuvura muni niperapi ala manggavia laporan polisi, ante ra visum. Anu hai najadimo proses ponyolidikan polisi.
Polisi muni noduga nariamo posisalara nggaulu korban FA ante torsangka polaku EK.
Nanganto dako ri kajadia hai, kana rapaka belomo pongawasan ri SPBU, ala domo maria vai tona nagado.**
