KAREBA SULTENG, PALU- Gubernur Sulawesi Tengah, Anwar Hafid nangelo Witan Sulaeman baru ri haja maimbala piala Soeratin U15 ante U17.
Anu hai niulina ritempona nobuka haja piala Soeratin Sulteng, ri lapanga pomaimbala Gawalise, Kelurahan Tipo, Ngata Palu, eo Araba (2/9/2026).
“Kita madota manggava topomore mpu-mpu nesuvu dako ri Sulawesi Tengah, eva Witan Sulaeman, ante topomore ntanina namala nompaka vangi ngata,” panguli i Anwar Hafid.
Niulina, pamarenta Sulawesi Tengah mpu-mpu neduku pombinaan maimbala, utamana ka ngana kodi.
‘”Ri kauluna, nuapa nikaviata eo hi, kana rapaka dupa. Kami merapi roa-roa Askab ante Askot manggavia muni haja ri libura mboto. Ri tempona ngena, mamalamo raposinggavaka pura topome naheba dako riara ngata bo klub ri Sulawesi Tengah,” petevaina.
Ia muni nerapi ka Kotua KONI Sulteng ala mpu-mpu nopeili olahraga maimbala. Anu hai mohadapi Pekan Olahraga Nasional (PON) 2028.
Gubernur muni kana modekeika anggaran pombinaan ka tim Sulawesi Tengah ane ngena atlit hau mobarangka ri haja nasional.
Ri tempona hai, gubernur niporoa Ketua Komite Olahraga Nasional (KONI) Provinsi Sulawesi Tengah, Fathur Razaq.
Haja piala Soeratin rancanana nikavia dako ri tanggala 2 sampe 8 September 2026, ri lapanga Gawalise Tipo ante lapanga Nunu.
Sema padagi ri piala Soeratin ngena mowakili Sulawesi Tengah hau momore kompetisi nasional ri Bogor tanggala 12 september 2026.**
