KAREBA SULTENG, DOLO- Kabilasa ante randa ri Tulo, Kecamatan Dolo, Kabupaten Sigi nompatuvu vai Festival Pomore nu Ngana.
Haja nikavia ampa eo hai, nompamula dako ri tanggala 28 sampe 31 agustus 2026.
Nadea ngayana pomore ri festival, eva F1 Boa (gledekan/roda-roda atau lomba sepeda kayu), Mosaka Bau (menangkap ikan), Kadende (engklek), Kelar (halang rintang), Mompene Kalosu (panjat pinang) dan Tilako (enggarang).
Festival hai nikavia, ledo aga mopaka damba todea, tapi muni mompakitaka ka ngana-ngana berimba pomore totua nggaulu.
Ketua panitia festival, Makmur (Muri) nangulika Pomore nu Ngana napernamo nikavia ruampulu mpae naliu. Ri tempona hie, haja hai nipatuvu vai.
“Kami nanggita ngana deanapa nomore teknologi modern. Pomore nggaulu eva tilako, kadende, kelar, nosaka bau, niboliakamo. Naria muni tona natuvu ri randua generasi, domo ninasina pomore nggaulu,” panguli i Muri ri eo Minggu (30/8/2026).
Niulina, nompatuvu vai pomore nggaulu, ala budaya hai namala radekeika ngana-ngana ri kauluna.
Nitambaina muni, festival mpae hie niikuti noatu peserta. Ane pomore F1 Boa ante nosaka bau, niikuti satu bo rua pulu peserta. Randua pomore hai, deanapa niikuti ngana SD dako kelas sangu sampe kelas aono. Vesia muni lomba kadende ante kelar, niikuti ngana kodi.
Ledo aga hai, festival mpae hie, panitia muni nanggavia lomba mompene kalosu ante kelar. Ane nompene kalosu, khusus niikuti kabilasa roso. Ane kelar, niikuti mombine PKK.
Festival hai muni panguli i Muri, ledo aga niikuti tona ri Tulo, tapi muni niikuti tona dako ri kecamatan Sigi, Ngata Palu, ante Kabupaten Donggala.
Nambaso ntoto rarara ala Festival Pomore nu Ngana kana majadi agenda tahunan. Ala mamala mompaka roso posampesuvu todea ri ngata Sulawesi Tengah.**
