KAREBA SULTENG, PARIGI MOUTONG- Niposabaka urusa nanginda motoro, tuaka (AR) netimbe tueina (JE), ri Dusun ampa, Desa Malino, Kecamatan Ongka Malino, Kabupaten Parigi Moutong, eo Sine bongina (25/5/2026).
Kajadiana nompamula ri tinti ovalu bongina (20.00 wita) ri doyata banua sampesuvuna. Riumba JE nakava ri banua totuara manginda motoro tuaka mombinena, Sarija. Tapi motoro ledo naria ri banua.
Nanggisanai motoro ledo naria, korban (JE) nesuvu dako ri banua nompeulu bo narau. Nangepe tueina eva nojarita kasara, torsangka AR nangala taono neraga bo netimbe JE. JE nabaka ri karaka njidi, tavu nggada njidi, ante timpu.
Nangepe kajadia hai, tona riara ngata hau nanggeni JE ri Puskesmas Ongka, tapi dokter noparesa bakana nanguli kana ra keni ri ruma saki Tombolotutu Tinombo.
Ri tempona muni hai, Bhabinkamtibmas Desa Ongka ante anggota Polsek Bolano Lambunu namala nosaka polaku (AR) ri banuana. Polisi muni nangala barang bukti taono nipake netimbe.
“Nangepe kareba tona nitimbe, anggota kami nobarangkamo hau ri bela nu kajadia. Nosaka topo timbe, nangala barang bukti, ante nojagai nemo sampe mandate urusana. Kasus hi da nosolidiki,” petevai Kapolsek Bolano Lambunu, Iptu Nyoman Jayus Mulyawan, ri eo Salasa (26/5/2026).
Ia muni nerapika ka sampesuvu JE ante todea riara ngata ala domo magado, dekeikamo urusa hai ka polisi.
“Kami merapi ka todea ala domo mabilisi, bo mobalasi. Dekeikamo urusana ka polisi,” petevaina.
Polisi muni da nangelo nuapa ntoto sabana sampe nakajadia petimbe, ante noantoaka berimba kondisi korban (JE) ri ruma saki.**
