KAREBA SULTENG, PALU- Dako ri hasele panjayo ri gade Palu, ali nu ose ledo nasimbayu. Naria nasuli bo ledo nasuli. Ane ri gade Inpres, ali nu ose sapulu papitu njobu, ante sapulu tatalu njobu.
“Alhamdulillah, pangane kami nompekutana ali nu ose ri gade Inpres, alina sapulu tatalu njobu, ante sapulu papitu njobu,” panguli Wakil Wali Kota Palu, Imelda Liliana Muhidin ri tempona hau nosidak ri gade, eo Jumaa padondo (21/8/2026).
Ri gade Masomba niuli i Imelda, ali nuose sapulu alima njobu bo limatu, ante sapulu papitu njobu.
Ose Napu alina naede aga sapulu alima njobu bo limatu. Ose ntanina rata-rata alina sapulu aono njobu bo limatu.
Haja hau nosidak hai panguli i Imelda, niposabaka nakuramo tona hau nangali ose ri gade.
Ia muni nerapi ka Satgas Pangan hau manggita ali nu ose ri gade. Ala namala rasani berimba porkombangan ose ri Ngata Palu. Nitambaina muni, stok ose ri Palu sampe sakuya mbula ngena kana naaama.
Pamarenta Ngata Palu muni nosarumaka mpu maria bantua ose dako Badan Pangan Nasional (Bapanas). Anu hai namala mobantu todea, ante nompaka stabil ali nuose ri gade.
Bantuan hai rancanana radekeika talupulu sangu njobu KK ri Ngata Palu. Nesua riambena desil alima. Deana ose radekeika talu pulu lite saito.
“InsyaAllah minggu ri ngayona Bapanas modekeikamo ose ka talupulu sangu njobu tona. Deana talu pulu lite saito,” niuli Imelda.**
