KAREBA SULTENG, PALU- Ampa komoditas nipobalu ri gade Inpres Manonda Palu nompamulamo nompene.
Eva ali numarisa ri gade Inpres, alina ovalu mpulu njubu sakilo. Parancina alina nompene sapulu bo ovalu njobu sampe rua pulu bo randua njobu sakilo.
Vesia muni ali nu pia lei nompene aono mpulu njobu sakilo. Pia mputi alina ampa pulu alima njobu sakilo.
Anu hai nojumboli ante ali nu marisa kariti. Ri gade Inpres, marisa kariti alina nanau ri talupulu alima njobu sakilo.
Ane ose SPHP alina ledo nompene bo ledo nanau. Alina ri kisaran oano mpulu njobu. Ose biasa alina sapulu ampa njobu ante sapulu aono bo limatu njobu sakilo. Ose belo alina sapulu papitu njobu sakilo.
“Alhamdulillah, eo hi kami hau nosidak gade. Haja hi ala rasani sakuya ali nu komoditas ri gade Inpres Manonda. Marisa, parancina, pia lei, ante pia mputi nompenemo alina,” panguli i Wakele Wali Kota Palu, Imelda Liliana Muhidin ri tempona hau nanjayo ri gade Inpres Manonda, ante Satgas Pangan ngata Palu, eo Juma’a (12/6/2026)
Ia muni nerapi ala maria korja sama pamarenta, topo gade, ante topo talua riara urusa hai. Pamarenta muni kana hau manggita ali nu komoditas ri gade, ala mamala rapaka simbayu puramo alina.
Niulina muni, stok nu ose ri ngata Palu magana rapake sampe randua mbula ri kauluna.
Ri tempona muni hai, topo gade lana nangulika lana Minyakita dopa ria nesua ri sangu santanga bula hi.
Nangepe pangadu topo gade lana, i wakele wali kota hau manggita stok lana Minyakita ri kantoro Bulog.
“Kami muni hau manjayo ri gudang Bulog. Apa topo balu lana nangadu dopa ria nesua lana Minyakita. Anu hau niposabaka naria program Gerakan Pangan. Tapi Bulog nangulikamo saminggu ri kauluna malancaramo ngena urusa hi,” pangulina.**
