KAREBA SULTENG, PALU- Saito langgai namate naonga ri tasi Kampung Nelayan, ri ngayo Kafe Senja, Kelurahan Talise, Ngata Palu, eo Jumaa padondo (22/5/2026).
Tomate nosangaka Abdul Kabir dg Lira, nonturo ri dala Sungai Wera, Kelurahan Ujuna, Palu Barat.
Kajadiana nompamula ri tinti alima padondo, i Abdul Kabir nopakeni bereina, i Hasnia (58) hau mandiu ri tasi Kampung Nelayan. Geira randua nakava ri libu pandiu tinti aono padondona. I Abdul Kabir nanggeni jerigen plastik nipajadika polanto.
Dopa nasae geira nandiu, kira-kira tinti santanga aono padondo, i Abdul Kabir nikava topo mei nolantomo ri tasi.
Ri tempona hai muni, naria tona nosangaka i Rivaldi Aruslan nonturo ri bivi ntasi. Nangepe naria tona naonga, ia hau norabu notaja i Abdul Kabir ri kabatana.
Nakava ri batana, i Abdul Kabir hau nikenii ri ruma saki Undata Palu, tapi dokter nangulika ia namatemo.
Kapolsek Mantikulore, Iptu Andi Rampewali notevaika anggota piket SPKT ante anggota Polsek Mantikulore, hau ri bela nu kajadia, tapi tomate hau nikenimo ri ruma saki Undata.
Kaupuna polisi aga nojagai bela nukajadia, ante nokumpulu informasi ala rasani saba kamatena.**
