KAREBA SULTENG, PALU- Pamarenta Ngata Palu morancana mobuka jalur randua arah ri jambata sangu ante jambata tatalu.
“Rancanana Pamarenta Ngata Palu mobuka jalur randua arah ri dala Gajah Mada jambata sangu, ante dala ri Wahid Hasyim. Rancana hi naupu puramo niposijaritai,” panguli i Wali Kota Palu, H. Hadianto Rasyid ri tempona posintomu ante dinas terkait, ri banua dinas wali kota, eo salasa (19/5/2026)
Panguli i wali kota, rancana hai ra uji coba nompamula ri tanggala 1 Juni 2026. Pamarenta muni kana mompeintaka rancana hai nabelo ato ledo katodea.
“Ri tempona uji coba, kana rapeinta apa randua jalur hai naefektif ato ledo,” niulina.
Panggava i wali kota, sala sangu alasa nikavia pombali nu jalur dala motoro ante oto, niposabaka naria nikava tona ledo nosabara bo ledo nepangala hau neeva arah.
Anu hai najadi porhatian pamarenta niposabaka namala mompaka cilaka ato posirumpa ri dala.
“Namala nipeintata todea hau moliu ri jambata sangu, biasana ledo nosabara, kaupuna kapola-polamo neeva arah. Vesia muni ri dala Wahid Hasyim,. Anu hi najadi porhatian,” petevai i wali kota.
Rancana hai ledo aga nompaka belo ante mompaka salama tona ri dala, anu hai muni rasarumaka mamala motumbo petumbu nuekonomi todea riara ngata.**
