KAREBA SULTENG, PALU- Naupu nocurhat masala Dana Bagi Hasil (DBH) pertambangan, ri tempona posintomu mbaso ante Komisi II DPR RI, Gubernur Sulawesi Tengah, i Anwar Hafid nitalipo Menteri Perencanaan Pembangunan Nasional (Bappenas), eo Kamisi (1/5/2025).
Kapala Bappenas nerapika i Gubernur Sulteng ala mosusu kajian resmi partama ri tingkat nasional. Anu hai majadi harapa ka Provinsi Sulawesi Tengah ala manggava DBH mabelo.
“Alhamdulillah, pangane padondo ri tempo kami nanggavia haja talk show ‘Berani Ngopi’ ante roa-roa serikat pekerja KLS, yaku nitalipo kapala Bappenas. Ia nerapi tulungi ala yaku manggavia kajian ala morambanga rabahas ri Jakarta, ala Mamala rapeinta bo ra dekeika ke presiden, berimba belona DBH ka todea ri Sulteng,” panguli i Anwar Hafid.
Gubernur Anwar Hafid nangaku porjuangan manggava DBH, ledo aga partama nikaviana. Ri tempona najadi Bupati Morowali, ia nasaromo nosuara ala ngata penghasil Nikel manggava bagia DBH mabelo.
“Panggavaku, anu hi kana ra porjuangkan pura stakeholder ante todea riara ngata. Niposabaka ngatata hi nohaseleke devisa negara. Apa nadea industri smelter ri Sulawesi Tengah. Anumo hai, nambaso harapata pura ngena, kita manggava bagia DBH maadil,” niulina.
Niulina muni, ledo nasimbayu DBH ante CSR perusahaan. Riumba DBH langsung nesua ri pamarenta daerah. Anu hai namala rapake todea ane naupumo perusahaan nangala hasele nutambang. Ane CSR hai nikenisi perusahaan, sehingga ledo namala rakontrol.
“Nasukuru ntoto yaku nuapa niporjuankan hi naviralmo bo nanggava dukungan todea. Nikitaku ri grup-grup whatsapp, deana geira nedukung pura,” pangaku i Anwar Hafid.
Pamarenta Provinsi Sulawesi Tengah ri temponamo hi, nosusunmo data ante rancana program-program pombangunan dako ri hasele DBH. Sala sangu program unggulan najalamo hai “Berani Cerdas”. Riumba program hai nodekeika beasiswa ka todea napande ante nakasiasiasi ri Sulawesi Tengah.
“Sampe eo hi, lima pulu njobumo todea ri Sulawesi Tengah mondaftar ala manggava beasiswa,” petevai i Gubernur.
Ia muni nerapi ka pamarenta pusat ala DBH pertambangan ka Sulteng mabelo pobagina. Anu hai napenting ntoto morealisasikan program-program daerah. Ala mompaka belo katuvua todea riara ngata.**
